“Ka imi la hatene katak ita hotu ne’ebé hetan batizmu iha Kristu hetan batizmu iha Nia mate? Nune’e ita hakoi hamutuk ho Nia liuhosi batizmu iha mate, atu nune’e, hanesan Kristu moris hi’as hosi mate liuhosi Aman nia glória, nune’e mós ita bele moris iha moris foun.”
Roma 6:3,4.

🌱Ita haree ona dalan oioin kona-ba batizmu. Iha batizmu imersaun, iha batizmu ho rega, batizmu ho mina, batizmu iha neve, ka batizmu hodi hasa’e bandeira. Maibé, haree ba objetivu batizmu nian, métodu imersaun nian iha signifikadu vizivel kompletu. Ida-ne’e signifika saida?

Batizmu mak símbolu Kristu nia mate no moris-hiʼas. Bee ne’ebé taka isin simboliza taka terus no susar (Salmo 42:7), tanba ne’e, Jezús nia batizmu ho bee hatudu uluk terus, mate no hakoi ne’ebé nia sei esperiénsia (Markus 10:38) no sai hosi bee ko’alia kona-ba nia moris-hi’as (Roma 6:3-5).

Batizmu sei la iha signifikadu nu’udar símbolu Kristu nia terus nian, “se kongregasaun apostólika pratika batizmu oioin ne’ebé la’ós liuhosi imersaun.” Tan neʼe, ​​“razaun forte liu ba batizmu liuhusi imersaun mak teolójiku.” (“Batizmu” Ensiklopédia SDA, p. 128).

Batizmu mós hanesan símbolu mate husi sala no moris ba Maromak. Iha batizmu fiar-na’in sira esperiénsia ita-nia Na’i nia terus. Paulo dehan, iha Roma 6:3, 4 “Ka imi la hatene katak ita hotu ne’ebé hetan batizmu iha Kristu hetan batizmu iha Nia mate? Tan ne’e, ita hakoi hamutuk ho Nia liuhusi batizmu iha mate, atu nune’e, hanesan Kristu moris hi’as husi mate tanba Aman nia glória, nune’e mós ita bele moris iha moris foun.”

Ema fiar-na’in nia relasaun íntima ho Kristu espresa liuhosi deklarasaun sira hanesan “hetan batizmu iha Kristu Jezús”, “hetan batizmu iha Ninia mate”, no “hakoi hamutuk ho Nia liuhosi batizmu.” Nune’e, liuhusi aktu simbóliku batizmu nian ema fiar-na’in tama iha Kristu nia mate, no iha sentidu reál katak mate sai ninia mate, no nia tama iha Kristu nia moris-hi’as, no moris-hi’as ne’e sai ninia moris-hi’as. Ida-ne’e hotu signifika saida?
Ida-ne’e signifika katak nia mate ba sala (Roma 6:6), signifika katak nia hetan kruzifikasaun hamutuk ho Kristu (Galasia 2:19). Ida-ne’e signifika hakoi sala tuan sira hotu. No nia sai hosi bee simboliza moris-hi’as atu sai ema foun. Ne’e signifika “buat tuan liu ona, buat foun mosu ona” (2 Korinto 5:17).

Hein katak ita sira ne’ebé simu ona batizmu sei hetan nafatin moris foun loron-loron.

Hakerek-na’in:
Kathleen-Jonathan Kuntaraf